[ دروس تصوير ] الدرس رقم ٤ – الآيزو ISO

 

بسم الله الرحمن الرحيم

السلام عليكم ورحمة الله وبركاته

نشكر جميع المتابعين على أسئلتهم وتواصلهم ودعمهم للموقع.

درس اليوم هو عن آخر عنصر من عناصر مثلث التعريض

مجرد تذكير سريع

قلنا ان مثلث التعريض يتكون من ثلاث عناصر رئيسية

١- سرعة الغالق

٢- فتحة العدسة

٣- الحساسية (وهي عنوان درسنا اليوم)

الحساسية – ISO

الحساسية هي الحساسية زي ما قلنا أمس بأن فتحة العدسة هي فتحة العدسة

لا من جد عاد .. بدون استهبال

الحساسية المقصود بها حساسية الحساس للضوء

يعني وش كثر الحساس يتأثر بالضوء.

أنا متأكد ان الكثيــــر قد صوروا صور وطلعت زي هذي

وكثيرين بعد ما يشوفون كاميراتهم تصور زي كذا يقولون كاميرتي بايخة ويرميها في الدولاب أو في الدرج أو نلقاه عارضها للبيع في أحد المنتديات

طيب انتظر شوي .. شوف وين المشكلة .. ليش مستعجل ؟

لا تتوقع انك أول واحد يستقعد له الآيزو تراهي معقده المصورين من زمــــان

قبل ما أجيب لك قصص الأولين مع الحساسية أو الآيزو. خلونا نشوف متى نحتاج نعدل في الآيزو

في مثلث التعريض نعرف ان لــ

سرعة الغالق تاثيرين : التحكم بالضوء و تجميد الحركة

 فتحة العدسة تأثيرين : التحكم بالضوء و عمق الميدان

إذا المصور يبي يصور صورة ويحتاج إعدادات معينة لسرعة الغالق (مثلاً ١/60٠٠)

ويبي أكبر فتحة عدسة ممكنة لعدسته مثلاً (٣.٥)

وصور صورة وطلعت مظلمة زي كذا

والمصور مرررة متورط ..

ما يقدر يغير سرعة الغالق ويخليها أبطأ لأنه خايف من الاهتزاز

وما يقدر يغير فتحة العدسة لأن العدسة هذي امكانياتها

وش يسوي ؟ يعتزل تصوير ؟

لا طبعاً

وقتها يبدأ يغير في الآيزو.. ويرفعه

الآيزو في الكاميرات يتدرج ما بين الـ ٥٠ إلى ٢٠٤٨٠٠ وأكثر ويكون على وقفات زي كذا

٥٠ – ١٠٠ – ٢٠٠ – ٤٠٠ – ٨٠٠ – ١٦٠٠ – ٣٢٠٠ – الخ

كل ما كان القيمة أقل كل ما كانت كمية الحساسية أقل وبالتالي ضوء أقل في الصورة.

بتقولون ارفع الآيزو على أعلى شيء !

المصور اللي قبل شوي كان مجبور رنه يرفع الآيزو عشان ما تكون صورته مظلمة

يوم رفع الآيزو شوفوا وش صار

طلعت لنا صورة بتعريض متناسب .. بس في المقابل واجهنا عيب التحبب في الصور أو النويز noise

التحبب في الصور هو أكبر عيوب رفع الآيزو

الحمدلله مع التطور في الكاميرات والحساسات صار بإمكان المصور انه يرفع الآيزو إلى ٦٤٠٠ ومايوضح شيء في الصورة (بعض الكاميرات مو كلها)

خلونا نشوف مقارنة بين الصورتين قبل مايرفع الآيزو وبعد

نشوف على اليسار صورة بدون نويز بس مظلمة

على اليمين صورة واضحة بس كلها نويز

تكلمنا قبل شوي وقلنا ان المصورين الأولين تعذبوا من الآيزو .. ليه ؟

الحين عندنا حساس والحساس هو اللي يتأثر بالحساسية

بس أول مافيه حساس .. كان فيه فلم

فكان المصور إذا يبي يغير الآيزو يروح يغير الفلم

والله مشوااااار

الحين بس تفر لك زر في الكاميرا وخلاص

كل موديل كاميرا يختلف عن الثانية في المدى حق الآيزو الخاص فيها

راجع مواصفات الكاميرا وشوف وش المدى الخاص بكاميرتك

كل ما قل الآيزو كل ما كانت الصورة أنقى وأكثر دقة .. بس في المقابل الضوء اللي يدخل أقل

دائما … خل الآيزو آخر الحلول لديك

جرب تغير  سرعة الغالق أو فتحة العدسة للوصول للتعريض المثالي

إذا ما قدرت وقتها جرب الآيزو

في حال صورت بآيزو عالي وطلعت الصورة محببة وكلها نويز

ممكن عن طريق برامج التعديل ( زي الفوتوشوب ) انك تقلل من النويز .. بس بشكل بسيط

لكثرة الكاميرات وتنوعها واختلاف طريقة تعديل الآيزو فيها .. ما حطينا أمثلة

إذا ما عرفت كيف تغير الآيزو ياليت ترسل رسالة إلى الإيميل الخاص بالموقع

أو بالرد على الموضوع هنا

أو التواصل معنا في تويتر

فكرة للتطبيق
طف اللمبات الموجودة في الغرفة .. ما عدا لمبة وحدة

وصور صورة بأقل آيزو ممكن ..

كيف كانت النتيجة ؟

ارفع الآيزو الين توصل لنتيجة مناسبة

كبر الصورة وشوف الدقة

شكراً لكم