السلام عليكم ورحمة الله وبركاته
قبل شهر أو شهرين تكلمنا عن تصوير البورتريه وبعض المعلومات عنه وقسمناه إلى ٣ أقسام
تصوير البوتريه للأطفال والمواليد
في موضوع اليوم بنتكلم إن شاء الله عن تصوير المجموعات
تصوير المجموعات
في هذا الموضوع بنتكلم عن تصوير الأشخاص إذا صاروا أكثر من اثنين. يعني ثلاثة أو أربعة أو خمسة تقريباَ. لأن أكثر من كذا يصير صعب التحكم فيهم.
في موضوعنا بنتكلم عن أهم الوضعيات والنصائح لتصوير المجموعات.
١- وين الدرج ؟
أقصد بالدرج السلالم، لا تتوقعون أقصد واحد درج.
مهوب شرط درج، ممكن يكون أي شيء ثاني، كنبة/كرتون/سيارة .. الخ.
نحتاج الدرج أو أي بديل له عشان نرتب الأشخاص بأي طريقة ويكون مستوى الرأس فيها مختلف.
ولتوضيح ذلك، خلونا نشوف الفرق بين المثالين في الأسفل
أو
أيهم أفضل ؟
بنسوي نفس الشيء وقت تصوير المجموعة.
وحتى لو ما كان فيه كنبة، ممكن الناس تجلس على الأرض وبوضعيات مختلفة، بس المهم جداً ان ما نحصل على نتيجة فيها تصير رؤوس الأشخاص على نفس المستوى
٢- شوفني عشان أشوفك
الصورة الجماعية حلوة وهدفها جميل وتحمل ذكرى اجتماعات وجلسات رائعة (في الغالب)
وأسوأ شيء ممكن يصير انك تصور مجموعة وتكتشف ان فيه واحد من الموجودين ما صورته لأنه كان متغطي بواحد ثاني.
من الأفكار الجميلة للتصوير وبإنك إن شاء الله ما تكون نسيت أحد، اسأل كل الحضور، أنتوا تشوفوني ؟ تشوفون كاميرتي ؟ تشوفون عدستي ؟
إذا كانت الإجابة من الكل “نعم”. توكل على الله وصور
٣- إعدادات التصوير
تتذكرون درس ( عمق الميدان )، هنا يفضل تطبيقه وبشدة.
إذا بتصور، صور بفتحة عدسة ٥.٦ أو أصغر ، تصور بفتحة عدسة ٨ بيكون أفضل وأفضل. بس تأكد وجود إضاءة كافية.
وسرعة الغالق حاول ما تكون أقل من ١/١٠٠
والآيزو، متغير. على حسب الإضاءة الموجودة.
٤- استخدم وضع التصوير المتسلسل
تخيل بعد ما تصور المجموعة، وترجع للبيت وتراجع الصور وكل واحد منهم يتصل عليك ( ارسل الصور .. وين الصور … متى تجينا الصور ؟ الصور آخذها بفلاش ؟ والا بترسلها على الإيميل؟ وش رايك تحطها في الفيس بوك … الخ)
تخيلوا بعد هالكلام كله تطلع الصور فيها واحد أو أكثر من واحد مغمضين!!
وش بتسوون ؟ تفتحون عيونهم بالفوتوشوب ؟
الأفضل وقت التصوير، تصور بوضع متسلسل وصور أكثر من صورة. ولا تناديهم يشوفونها، لأنه بيصعب عليك تجميع الأشخاص مرة ثانية.
صور صورة لضبط الإعدادات
ثم صور صورة أخرى للتأكيد على الإعدادات
وبعدها
صور وصور وصو باستخدام وضعية التصوير المتسلسل
٥- استخدم تكوين المثلث
ختاماً، تصوير المجموعات يدل على التآلف والقرب والوحدة وذلك يتأكد عن طريق مشاركتهم للبعض في صورة واحدة.
وقت تصويرك للمجموعة حاول ان يكونون قريبين لبعض.
فيه وضعيات كثيرة لتصوير المجموعات ومن أجمل الوضعيات لصور المجموعات هي ترتيب الأشخاص كمثلث،
نتمنى أن تكونوا قد وجدتم الفائدة في موضوع اليوم
كل الشكر والتقدير لكم على دعمكم ومتابعتكم