السلام عليكم ورحمة الله وبركاته
أمس تكلمنا عن تصوير البورتريه ذكرنا اننا بنقسم البورتريه لأربع أقسام رئيسية
تصوير المواليد – تصوير الأطفال – تصوير الشباب – تصوير كبار السن
وتكلمنا عن تصوير الشباب وأهم النقاط اللي تساعدنا للوصول بصورة جميلة
:
موضوع اليوم بيكون إكمال لموضوع تصوير البورتريه
بس بنتكلم عن قسم آخر من أقسامه وهو
تصوير كبار السن
تصوير البورتريه – كبار السن
تصوير كبار السن من المواضيع المفضلة واللي فيها لمس كبير لمشاعر المشاهد
كثير من المشاهدين يوقفون كثير عند صور كبار السن خصوصاً اللي يبين فيها الملامح بشكل كبير
نصائح عامة لتصوير كبار السن
١- احترام المودل
أهم شيء الاحترام ، حتى لو كان كبير في السن يبقى إنسان وبنسميه مودل
محد يعرف عن ظروفه والأمور اللي مر فيها.
وش تخسر لو تكلمت معه بكلمة حلوة أو استأذنته أذا جيت تصوره؟
وانتبه للكلام معه ولا تجرحه بأسئلة ممكن تخليه يتضايق منك
جزء من احترام المودل ، انك ما تطول معه
لا تجلس تصوره ٢٨١٧٣٦٣١٢٨٥٦٨ صورة ، وكل شوي تتفرج وتعدل وتصور
اعرف إعداداتك وصور.
نصائح عامة لتصوير كبار السن
٢- الإضاءة
الإضاءة عامل مهم في تصوير البورتريه
ومثل ما ذكرنا أمس ، الإضاءة ممكن تكون طبيعية أو صناعية
إضاءة طبيعية
مثل الشمس
:
وإضاءة صناعية
مثل الفلاشات الخارجية
نصائح عامة لتصوير كبار السن
٣- الإعدادات المناسبة
لتصوير كبار السن إعدادت في التصوير تختلف عن الشباب وعن الأطفال
كبار السن ملامحهم غير .. لو جاتنا الصورة سوفت أو ناعمة بيكون فيه تعارض كبير في الصورة
لازم تكون الصورة حادة بشكل كافي
وللوصول لهذه الحدة يفضل تصوير كبار السن بفتحة عدسة لا تزيد عن f/8
نصائح عامة لتصوير كبار السن
٤- الخلفية
كبار السن لهم ملامحهم الخاصة وتفاصيل وجههم اللي تعطي اهتمام كامل للمشاهد
إضافة خلفيه تحمل تفاصيل أخرى ممكن تشتت المشاهد وتسحب انتباهه إلى شيء يعتبر ثانوي في هذه الصورة
يفضل في تصوير كبار السن استخدام خلفيات موحدة اللون أو ذات تفاصيل خفيفة
أو انه خلال التصوير يتم عزل الخلفية
يفضل وجود الخلفية إذا كان لها ارتباط مباشر مع المودل
يتضح لنا ان الخلفية أشجار ولبس المودل يدل على عملها في مجال الزراعة
فيه ترابط بين الشجرة والزراعة والمودل
نصائح عامة لتصوير كبار السن
٥- زاوية التقاط الصورة
أمس في موضوع تصوير بورتريه الشباب ذكرنا الزوايا المختلفة زاوية أمامية- ٣/٤ – ٢/٣ – بروفايل
في غالب صور كبار السن .. تكون الصورة أمامية
ليه ؟
سألنا متابعينا في تويتر عن هذا السؤال وهذي إجاباتهم
@365tut أعتقد لإن التعابير تكون أوضح وأعمق وأصدق .. !!
:
@365tut لأن من رأى الجنّه لايستطيع أن يبتعد عنها يمنةَ ويسرى !
:
@365tut أعتقد لان الهدف كله بالوجه 🙂
:
صور كبار السن تكون من المقدمة لإبراز كافة التعابير
بعكس الشباب اللي ممكن الصور المائلة أو الجانبية تبرز ملامح أخرى كمقدمة الأنف أو شعر الرأس
في كبار السن .. الجبهة والحواجب والعينين والخدين والفم كلهم تحمل تفاصيل أهم من مقدمة الأنف وشعر الرأس
:
يفضل أخذ صور جانبيه لكبار السن في حالتين
– تصوير أكثر من شخص
– تصوير كبار السن وقت شغلهم أو عملهم
لأن الهدف الرئيسي وقتها ما راح يكون إبراز معالم وتفاصيل الوجه كثر نظرتهم أو واقع عملهم
نصائح عامة لتصوير كبار السن
٦- توحيد اللون
ما لاحظتوا شيء في الصور اللي فوق ؟
ما انتبهتوا لصور كبار السن بشكل عام ؟
دائماً تكون أبيض وأسود
أو تكون الصور Sepia
مثل
توحيد اللون في تصوير كبار السن يعطي تركيز أكبر على التفاصيل في الصورة
بتوحيدك للون توحد فكر المشاهد إلى جزء واحد في الصورة
نصائح عامة لتصوير كبار السن
٧- تصوير الرأس فقط واليدين أحياناً
في غالب تصوير كبار السن .. يكون التركيز فقط على الرأس (الوجه)
أغلب تفاصيل كبار السن تكون في الوجه
الوجه يحمل التجاعيد
يحمل العيون اللي تأثرت بالكبر
ممكن يكون فيه نظارة بسبب ضعف النظر
غير الرأس .. نلقى تفاصيل كثير في اليد
فأنت كمصور .. إذا بتصور أي شيء أكثر من الرأس فنقترح عليك إضافة اليدين أو يد واحدة
نصائح عامة لتصوير كبار السن
٨- ملابس المودل
الملابس تلعب دور كبير في التصوير ، تعطي فكرة كبيرة عن المودل واللي يمر فيه
ممكن تكون الملابس دليل على شغله مثل ما وضحنا في هذه الصورة
وممكن تكون الملابس مع اليد توصل رسالة للمشاهد وتحكي واقع للمودل
نصائح عامة لتصوير كبار السن
٩- التعديل على الصور
مثل أي نوع آخر من التصوير ، الصور تحتاج معالجة (أدري فيه كثيرين بيقولون ما يصلح تتعدل الصور – بنتناقش بعدين)
أهم أنواع التعديل اللي يطبق على تصوير كبار السن هو زيادة الحدة
إنا نستخدم فتحة عدسة صغيرة عشان الحدة .. بس ما يكفي
أحياناً نضطر اننا نزيد الحدة أكثر في تصوير كبار السن
بالإضافة للحدة .. عندنا التحويل للأبيض والأسود أو توحيد اللون
التعديل ممكن يأثر تأثير كبيـــــر على الصورة
وهذا مثال
:
وبعد التعديل
التعديل شمل نقاط كثيرة
تحويل للأبيض والأسود
اقتصاص جزء من الصورة
زيادة حدة الصورة
توضيح العينين وزيادة لمعة العينين
تدرج أسود لأحد جوانب الصورة
نصائح عامة لتصوير كبار السن
١٠- الابتسامة
كثير من المصورين يهدفون لتصوير كبار السن عشان يبينون تعب السنين وشقاء الأيام ووجع الليالي وسواليف ما تنتهي
بس حتى لو كان فيه تجاعيد .. مهوب معناها لازم يكون الواحد حزين
صوروهم وهم مبتسمين
جربوا وش انتوا خسرانين ؟
هذا كان فيما يخص تصوير كبار السن
تصويرهم يعطينا تواصل أكثر معهم وتقدير لكل شيء مروا فيه
أتمنى انكم وجدتم الفائدة في هذا الدرس
نشكركم على متابعتكم ودعمكم لنا