السلام عليكم ورحمة الله وبركاته
نشكركم على متابعتكم لنا ونشكركم على الدعم الكبير اللي تقدمونه للموقع والحساب الخاص بنا في تويتر
متابعة لمواضيعنا السابقة واللي تكلمنا فيها عن أنواع التصوير ، اليوم بنتكلم عن موضوع جديد من أنواع التصوير.
:
:
كلامنا اليوم بيكون عن التصوير بالأبيض والأسود
التصوير الأبيض والأسود موجود من زمان ، الناس أصلاً كانوا مجبورين عليه انهم يصورون بالأبيض والأسود.
بس خروجه كنوع من أنواع التصوير ما صار إلا بعد ما طلعت الكاميرات اللي تصور ملون.
التصوير بالأبيض والأسود – لماذا ؟
بعض المتابعين للفن يسأل ، عندكم كاميرات تصور ملون. ليش تروحون تصورون أبيض وأسود؟ ليه بعد ما تنسخون الصورة تشتغلون عليها كثيــر بالفوتوشوب وتحولونها لأبيض وأسود.
السبب
لأن صور الأبيض والأسود تكون أعمق في المعنى وتعطي تركيز أكبر للمشاهد بأنه يركز على عناصر الصورة بدون أي تشتيت.
التصوير بالأبيض والأسود ممكن يكون في أي مكان وفي أي نوع من أنواع التصوير
في تصوير الطبيعة ، الكثير من المصورين يفضلون تصوير المناظر بالأبيض والأسود
ممكن نصور بالأبيض والأسود – تصوير بورتريه
للتصوير بالأبيض والأسود بعض النصائح والاقتراحات ، سيتم تفصيل سلسلة مواضيع عن الأبيض والأسود مستقبلاً ، لكن في موضوعنا هذا بنذكر بعض النقاط الهامة لتوضيح مفهوم التصوير الأبيض والأسود
التصوير بالأبيض والأسود
الابتسامة
بعض المبتدئين في مجال التصوير أو المهمتين بالتصوير بشكل عام يربطون التصوير بالأبيض والأسود بأنه تصوير حزين ، وانه طريقة لتوصيل الحزن للمشاهد
وهذا صحيح وغير صحيح في نفس الوقت،
صحيح لأنه بالفعل التصوير بالأبيض والأسود يساعد في أيصال مفهوم الصورة بشكل سريع للمشاهد بدون تشتيت الألوان مثل ما ذكرنا سابقاً
لكن ، غير صحيح ، لأن فيه كثير من الصور اللي تحمل ابتسامات ومشاعر فرح ومناظر جمالية في تصوير الأبيض والأسود
التصوير بالأبيض والأسود
RAW
ممكن بعض المصورين يصور أي صورة ، ويرجع يفتحها بالفوتوشوب ويغيرها لأبيض وأسود وخلاص.
لا طبعاً مو خلاص
التصوير الأبيض والأسود يبدأ من المكان اللي أنت فيه. وقبل لحظة التصوير
كمصور محترف، كل صورة تصورها يفضل انك تبني عليها التأثيرات اللي بتسويها بعدين. (مثلاً بسوي اقتصاص بسيط – عزل لوني – تحويل للأبيض والأسود.. الخ)
ويفضل بشكل كبيــــر ، إذا أنت ناوي تحول صورتك للأبيض والأسود ، صور بصيغة RAW (لمعرفة المزيد ، يفضل زيارة موضوع صيغ ملفات الصور)
التصوير بالأبيض والأسود
التباين – Contrast
التباين في الصورة مهم جداً ،التباين يخلق عمق في الصورة وتدرج كبير في أفكار المشاهد.
في التصوير بالألوان ، عندنا ألوان تفصل العناصر عن بعض ، بس في الأبيض والأسود ماعندنا غير التباين هو اللي يساعدنا في الفصل بين العناصر
التصوير بالأبيض والأسود
الإضاءة
الإضاءة تساعد كثير في خلق جو مناسب لتصوير الأبيض والأسود.
تدرجات الأبيض والأسود تتكون عن طريق انعكاس الضوء عليها، اختيارك لإضاءة مناسبة أو توقيت مناسب بيساعد في تكوين جميل
ولا تنسى عامل الظل ، ممكن يكون جزء رئيسي في الصورة
نتمنى أنكم وجدتم فائدة في هذا الموضوع
كل الشكر والتقدير لكم على جهودكم في دعم الموقع