السلام عليكم ورحمة الله وبركاته
فيه شيء ما أعجبني في الصورة بس ما أدري وشهو. هالكلمة نسمعها كثير خلال عرض صورنا لبعض المهتمين بالتصوير.
طيب وش الشيء اللي ما أعجبك، هذا إذا كان يتكلم بأدب. والا ممكن تسمع كلمة “فيها شيء غبي/بايخ بس ما أدري وشهو!!!
طيب يا بشر علمونا وين المشكلة فيه في صورنا ؟ نبي نتعلم. نبي نتطور. بس بكلمتك ما ندري وشهو ما تساعدونا أبد
خلال تصوير البورتريه فيه عوامل كثيرة تأثر على الصورة حتى وان كانت بسيطة مثل نظرة المودل ، واختلاف الفوكس إذا كان عن الأنف أو على العين، أو مثلاً وضع القدمين واستواء الكتفين في الصورة. كلها عوامل تأثر بشكل كبير مع انها أشياء بسيطة في الصورة.
موضوع اليوم يتكلم عن وضع اليدين في تصوير البورتريه
كيف تحط يدين المودل ؟
سألنا هذا السؤال لمتابعينا في تويتر
وهنا أغلب الأجوبة
فيه ردود أخرى وصلتنا وتم عمل ريتويت لبعض الإجابات
فيه اختلاف في وجهات النظر وفي موضوع اليوم بنتكلم بشكل عام وبعض النصائح لوضع اليدين في تصوير البورتريه
في حين تصوير البورتريه خصوصاً حين تصوير نصف الجسم أو الجسم كاملاً ركز على وضع اليدين للمودل
بس خلونا نتكلم بشكل عام.
الاقتصاص
في حين احتواء اليدين في الكادر ضروري نكون مركزين على يا ان اليدين تكون في الصورة أو ما تكون في الصورة
ما أشوف اننا نضيف (نصف) اليدين
اقتطاع اليدين غير مناسب خصوصاً إذا كانت جزء كبير من الذراع بارز فيها
يعني توضح اليد أفضل من إظهار الذراع
انشغال اليدين
خلال تصوير اليدين حاول دائماً انها ما تكون حائرة – بدون أي شغلة ولا مشغلة
حاول تخلي يد المودل تمسك بأي شيء أو تستند على أي شيء
استخدام المودل للقارورة ساعد ان اليدين ما تكون بلا شغلة ولا مشغلة
يمكن لاحظتوا ليش كثير من الصور تطلع حلوة إذا مسكوا الناس جوالاتهم أو كاميراتهم
وممكن بعد تكون اليدين مستندة على جدار أو رف أو طاولة
ضم اليد – للرجل ، وبسطها للبنت
خلال تصوير اليدين لرجل ، ممكن ان تضم اليد لتوضيح مزيد من الرجولة والقوة والشخصية
وللبنات ف بسط اليد وفتحها تساعد على توضيح الأنوثة والنعومة وشيء من الرقة
بالنسبة لتصوير اليد للرجال ، حاول انك ما تخلي الرجال يضم يده بقوة
تراه الدعوة مو ملاكمة
يمكن لو تعطيه كورة صغيرة أو منديل ويضم يده عليها بتساعد على تشكيل أجمل.
جرب بنفسك ، وما يحتاج تصور وشوف الفرق
الأصابع
في حين إظهار صورة اليد في البورتريه حاول انك تبعد الأصابع عن بعض.
قربهم من بعض يعطيهم تشكيل متداخل وبتظهر اليد كأنها جسم واحد ومشدود وممكن يكون ممل للمشاهد
الحركة
اليدين تعتبر من الأطراف في جسم الإنسان ، والأطراف أكثر الأعضاء حركة.
تأكد ان سرعة الغالق مناسبة وان المودل حركته بسيطة.
إضافة اليدين في تصوير البورتريه يعتبر إضافة جميلة وتغيير كبير في الصورة.
لكن إذا ماقدرت تصور المودل ويدينه في وضع مريح ، أقترح عليك ان تصوره ويدينه على الطاولة أو تصوره صورة بدون ما تظهر يدينه (رأس وكتفين)
نتمنى انكم وجدتم الفائدة في موضوع اليوم
كل الشكر والتقدير لكم على دعمكم ومتابعتكم